Chapitre XIII : comment Grandgousier congneut l’esperit merveilleux de Gargantua à l’invention d’un torchecul

Sus la fin de la quinte année Grandgousier retournant de la défaicte des Ganarriens visita son fls Gargantua. Là fut resjouy comme un tel pere povoit estre voyant un sien tel enfant.
Et le baisant et accollant l’interrogeoyt de petits propos pueriles en diverses sortes. Et beut d’autant avecques luy et ses gouvernantes: esquelles par grand soing demandoit entre aultres cas, si elles l’avoyent tenu blanc et nect ?
A ce Gargantua feist response, qu’il avoit donné tel ordre, qu’en tout le pays n’estoit guarson plus nect que luy. « Comment cela ? dis Grandgousier.
- J’ay (respondit Gargantua) par longue et curieuse experience inventé un moyen de me torcher le cul, le plus seigneurial, le plus expedient que jamais feut veu.
- Quel ? dict grandgousier
- Comme vous le rconteray (dist Gargantua) presentement. Je me torchay une foys d’un cachelet de velours de une damoiselle : et le trouvay bon : car la mollice de sa soye me causoit au fondement une volupté bien grande.
« Une aultre foys d’un cacjecoul, une aultre foys des aureillettes de satin cramoysi : mais la dorure d’un tas de sphères de merde qui y estoient m’escorcherent tout le derriere, que le feu Sainct Antoine arde le boyau cullier de l’orfebvre qui les feist : et la damoiselle, que les portoit.
« Ce mal passa me torchant d’un bonnet de paige bien emplumé à la Souice.
« Puis fiantant derriere un buisson, trouvay un chat de Mars, d’icelluy me torchay, mais ses gryphes me exulcererent tout le perinée.
« De ce me guerys au lendemain me torchant des guands de ma mere bien parfumez de maujoin.
« Puis me torchay de Saulge, de Fenoil, de Aneth, de Marjolaine, de roses, de fueilles de Espinards. (…)
« puis je me torchay aux linceux (1), à la couverture, aux rideauls, d’un coissin, d’un tapiz, d’un verd, d’une mappe, d’une serviette, d’un mouschenez, d’un peignouoir. En tout je trouvay de plaisir plus que n’en ont les roigneux (2) quand on les estrille. (…)
Je me torchay de foin, de paille, de bauduffe, de bourre, de laine, de papier. Mais
Tousjours laisse aux couillons esmorche (3)
Qui son hord (4) cul de papier torche.
(…) Escoutez que dict nostre retraict (5) au fianteur,
Chiart
Foirart
Petart
Brenous (6)
Ton lard
Chappart
S’espart (7)
Sus nous.
Hordous (8)
Merdous
Esgous
Le feu de sainct Antoine te ard (9)
Sy tous
Tes trous
Esclous
Tu ne torche avant ton depart
(…)
« Je me torchay après d’un couvrechief, d’un aureiller, d’ugne pantophle, d’une gibessiere, d’un panier. Mais o le mal plaisant torchecul. Puis d’un chappeau. Et notez que des chappeaulx les uns sont ras, les aultres à poil, les aultres veloutez, les aultres taffetassez, les aultres satinisez. Le meilleur de tous est celui de poil. Car il faict tresbonne abstersion de la matiere fecale.
« Puis me torchay d’une poulle, d’un coq, d’un poulet, de la peau d’un veau, d’un lièvre, d’un pigeon, d’un cormoran, d’un sac d’advocat, d’une barbute, d’une coyphe, d’un leurre.
« Mais concluent je dys et maintiens, qu’il n’ya tel torchecul que d’un oyson bien dumeté (10), pourveu qu’on luy tienne la teste entre les jambes. Et m’en croyez sus mon honneur. Car vous sentez au trou du cul une volupté mirificque, tant par la doulceur d’icelluy dumet, que par la chaleur temperée de l’oizon, laquelle facilement est communiqucquée au boyau culier et aultres intestines, jusques à venir à la region du cueur et du cerveau. Et ne pensez que la beatitude des Heroes et semidieux qui sont par les champs Elysiens soit en leur Asphodele ou Ambroisie, ou Nectar, comme disent ces vieilles ycy. Elle est (selon mon opinion) en ce qu’ilz se torchent le cul d’un oyzon. Et telle est l’opinion de maistre Jehan d’Escosse »

-------------------------------------
(1) Draps du lit
(2) galeux
(3) amorce
(4) sale
(5) lieux d’aisance
(6) sali d’excréments
(7) se disperse
(8) sale
(9) brûle
(10) duveté